Լսողության խանգարումներ ունեցող երեխաների բնականոն զարգացումը հնարավոր է միայն ժամանակին և ճիշտ պրոթեզավորման դեպքում։ 2002 թվականին լսողության խանգարումներ ունեցող առաջին 41 երեխաները ստացել են 82 բարձրորակ եվրոպական լսողական սարքեր: 2018 թվականին լսողական սարքեր ստացող երեխաների թիվը հասել է 257-ի։ Լսողական սարքերը տրամադրվում են անհրաժեշտ ներդիրներով։

2007 թվականից երեխաները նաև ստացել են թվային լսողական սարքեր, ինչպիսիք են Oticon SUMO DM-ը և Oticon Sensei SP-ն: Լսողական սարքեր ունեցող երեխաների մեծամասնությունը բարեհաջող սովորում է հանրակրթական դպրոցներում: Այնուամենայնիվ, այս երեխաները ունեն մի շարք հոգեբանական դժվարություններ, որոնք կապված են հաղորդակցության և խոսքի հետ: 2017 թվականից «Արաբկիր» բժշկական համալիր-երեխաների և դեռահասների առողջության ինստիտուտը և «Հովարդ Կարագյոզյան» ԲԲՀԿ-ն կազմակերպում են ռիթմիկ պարերի դասեր, որոնք նպաստում են զգայարանների համակարգման և լսողական ընկալման զարգացմանը, ինչպես նաև շարժման, հավասարակշռության և ռիթմի զգացողության ձևավորմանը։

Նույն թվականից կազմակերպվում են նաև համակարգչային դասընթացներ։ Լսողության խանգարումներ ունեցող 20 երեխաներ հնարավորություն ունեն ձեռք բերել անհրաժեշտ համակարգչային հմտություններ։