«Հովարդ Կարագյոզյան» Բժշկական Բարեգործական ՀԿ նորակառույց կենտրոնը Շիրակի մարզում

Նոյեմբերի 5-ին Շիրակի մարզի Գյումրի քաղաքում կարևոր իրադարձություն էր.քաղաքացիների առջև իր հյուրընկալ դռներն էր բացել «Հովարդ Կարագյոզյան» Բժշկական Բարեգործական Հասարակական Կազմակերպության նորակառույց երկհարկանի կենտրոնը։

Այստեղ կազմակերպությանը սիրում և վստահում են 1995 թվականից։ Այս տարիների ընթացքում Շիրակի մարզում գործող կենտրոնում մոտ 64.000 ատամնաբուժական և մոտ 8000 ակնաբուժական անվճար ծառայություններ են մատուցվել։

Հիմնադրամի գործադիր տնօրեն Իրինա Լազարյանն ասում է. «Եկավ մի պահ, երբ հասկացանք՝որակյալ ծառայություններն է՛լ ավելի լավ մատուցելու համար անհրաժեշտ է նորակառույց շենք։ Այսօր, Կարագյոզյան Հիմնադրամի 100-ամյա պատմության մեջ, սա մեր կողմից կառուցված առաջին շենքն է։ Այն խորհրդանշում և մեկտեղում է Կարագյոզյան ընտանիքի ցանկություններն ու պատգամը»։

Հայաստանի 3-րդ Հանրապետության անկախության հռչակագրին հետևեց ԱՄՆ-ում գործող«Հովարդ Կարագյոզյան» Հիմնադրամի կողմից Բժշկական Բարեգործական ՀԿ-ի հիմնադրումը Հայաստանում: 

Արդեն 30 տարեկան կազմակերպությունը ծառի նման մեծացել և արմատներ է տվել։ Այսօր գործում են թվով 5 կենտրոններ՝ Երևանում, Գյումրիում, Վանաձորում, Գորիսում և Արցախի մայրաքաղաք Ստեփանակերտում։

Կենտրոնները մինչև 14 տարին բոլորած երեխաներին մատուցում են բժշկական (ատամնաբուժական,ակնաբուժական) և սոցիալական անվճար ծառայություններ՝ սպասարկելով տարեկան շուրջ 50.000 շահառուների:

Շիրակի մարզի նորակառույց, բարձրակարգ շենքի բացման արարողության ժամանակ Իրինա Լազարյանն իր ողջույնի խոսքում նշեց, որ Հիմնադրամը կարևորում է նոր շենքի կառուցումը Գյումրիում՝ 1988 թվականի ավերիչ երկրաշարժից հետո. «Ծրագիրն իրականացնելիս վճռական ենք եղել օգտագործել տեղական ռեսուրսն ու տաղանդները»:

Կենտրոնի ոչ միայն պատերն են ամուր, շեն, գեղեցիկ, այն նաև զինված է նորագույն ատամնաբուժական սարքավորումներով, որոնց մի մասը կազմակերպությունը նվիրատվություն է ստացել միջազգային «Ռոթարի Սանրայս» ակումբի կողմից։

Շինարարության և բոլոր ծառայությունների հովանավորությունը Հիմնադրամինն է, որի տեսլականն է` լինել բժշկական և սոցիալական ծառայությունների մատուցմանոլորտում գերազանցության կենտրոն:

Իր տեսլականին հավատարիմ կազմակերպությունում բարձրակարգ բժիշկները  մշտապես վերապատրաստում են անցնում։ Իսկ ԱՄՆ-ում առկա է գործող խորհրդատու ժողով, որը մասնակցում է աշխարհի լավագույն նորարարությունների հաղորդմամբ ու դրանց կիրառության հմտությունների փոխանցմամբ՝ մշտապես բարձրացնելով բժիշկների մասնագիտական կարողությունները: