Կանադայի Սիդնեյ Սանրայզ Ռոթարի ակումբի անդամների հյուրընկալումը «Հովարդ Կարագյոզյան» ԲԲՀԿ-ում
Կանադայի Սիդնեյ Սանրայզ Ռոթարի ակումբի անդամներ Ջեք Դ’Օրսեյը, Յան Դոյլը, Էնն Դոյլը և Լուի Մաքլեոդը 2022 թվականի նոյեմբերին հյուրընկալվեցին «Հովարդ Կարագյոզյան» ԲԲՀԿ։
Այս կապակցությամբ նախատեսված էր քառօրյա շրջայց, ինչի շրջանակում «Հովարդ Կարագյոզյան» ԲԲՀԿ-ն մշակել էր բավականին հագեցած ծրագիր։
Ռոթարականների հետ առաջին հանդիպումը տեղի ունեցավ նոյեմբերի 2-ին «Հովարդ Կարագյոզյան» կենտրոնում։
Հանդիպման ընթացքում Կարագյոզյան կենտրոնի ղեկավար կազմը հյուրերին ներկայացրեց իրենց 100-ամյա պատմությունը։ Կազմակերպության գործունեության տեսական մասին ծանոթանալուց, մտքեր փոխանակելուց հետո, հյուրերը ծանոթացան նաև «Նորք» կլինիկայի բժշկական և սոցիալական ծառայություններին՝ գործի մեջ տեսնելով անձնակազմին:
Օրվա ամփոփումից հետո Յան Դոյլը, ներկայացնելով «Ատամնաբույժների միջազգային քոլեջ»-ը, նշեց վերջինիս հետ հնարավոր համագործակցության մասին։
Նոյեմբերի 3-ի շրջայցը սկսվեց Վանաձորից։ Այստեղ, ռոթարականները հանդիպեցին բժիշկներին, ծանոթացան վերջիններիս աշխատանքին, որի ընթացքում հանդիպեցին նաև փոքրիկ շահառուներին։
Հյուրերի համար հաջորդ կանգառը Գյումրին էր։
Նոյեմբերի 4-ին օրը սկսվեց Գյումրու կենտրոնի շրջայցով, որտեղ, նորակառույց կլինիկայում ռոթարականները ծանոթացան նորագույն սարքավորումներով հագեցած ատամնաբուժական բաժանմունքին, որոնց մի մասը հենց իրենք էին նվիրել Կազմակերպությանը։ Հյուրերը ծանոթացան նաև սոցիալական թիմի համար նախատեսված նոր կահավորված բաժանմունքին։ Այնուհետև, «Ատամնաբուժական կանխարգելում» ծրագրի շրջանակում, Կարագյոզյան կենտրոնի ատամնաբուժական թիմի հետ միասին, Շիրակի մարզի Մայիսյան և Թորոս գյուղերի միջնակարգ դպրոցներում անկացվեց սկրինինգ։ Գործընթացում ներգրավված էին 60 աշակերտ մի դպրոցից, 56՝ մյուսից։
«Ատամնաբուժական կանխարգելման» ծրագրի ղեկավար Կարին Կարբոյանը խոսեց ատամների ճիշտ խնամքի, բերանի խոռոչի և հիգիենայի կանոնների մասին, կատարեց նաև բերանի խոռոչի զննում։ Գործընթացում ցուցաբերած պրոֆեսիոնալ մոտեցումն անչափ տպավորեց հյուրերին։ Վերջում, «Հովարդ Կարագյոզյան» ԲԲՀԿ-ի կողմից երեխաներին տրվեցին նվերներ՝ ատամի մածուկներ և խոզանակներ։
Նոյեմբերի 5-ին՝ շրջագայության վերջին օրը, Գյումրիում տեղի ունեցավ «Հովարդ Կարագյոզյան» ԲԲՀԿ նորակառույց կենտրոնի բացման հանդիսավոր արարողությունը։ Ներկա էին մի շարք գործընկերներ և այլ հյուրեր։ Արարողության տպավորիչ լինելը պայմանավորված էր նաև այն հանգամանքով, որ վերջինիս մի մասն էին կազմում հենց «Հովարդ Կարագյոզյան» ԲԲՀԿ-ի փոքրիկ շահառուները, ովքեր հանդես եկան գեղեցիկ կատարումներով և հիացրին ներկաներին։
Երկուստեք հնչեցին երախտիքի խոսքեր, որոնք լցված էին չորս օրերի վառ տպավորություններով։ «Հովարդ Կարագյոզյան» ԲԲՀԿ-ի համար պատիվ էր ընդունել նման հյուրերի, ովքեր իրենց համագործակցությամբ խթանում են Կազմակերպության առջև դրված նպատակների իրականացումը։
Քառօրյա շրջայցն իրապես հաջողված էր, ռոթարականների և «Հովարդ Կարագյոզյան» ԲԲՀԿ-ի համագործակցությունը՝ նույնպես։
